ആരാണീ ശ്രീനിവാസന്‍; എഐസിസി സെക്രട്ടറി നിയമനത്തിനെതിരെ സുധീരന്‍

തിരുവനന്തപുരം: കെ.ശ്രീനിവാസനെ എഐസിസി സെക്രട്ടറിയായി നിയമിച്ചുകൊണ്ടുള്ള പാർട്ടി തീരുമാനത്തിനെതിരെ കോൺഗ്രസ് നേതാവ് വി.എം.സുധീരന്റെ ഫെയ്സ്ബുക് പോസ്റ്റ്. പാർട്ടി സംസ്ഥാനനേതൃത്വം പോലും അറിയാതെ എറണാകുളം സ്വദേശിയായ ഒരാൾ ദേശീയചുമതലയുള്ള നേതാവായത് പിൻവാതിൽ നിയമനം തന്നെയാണെന്ന് സുധീരൻ ആരോപിക്കുന്നു. കോൺഗ്രസ് പ്രവർത്തനരംഗത്ത് മതിയായ പരിചയം പോലുമില്ലാത്ത ഒരാൾ ഇത്ര സുപ്രധാന സ്ഥാനത്ത് എത്തിപ്പെട്ടത് ഒഴിവാക്കേണ്ടതായിരുന്നു. പാർട്ടി പ്രവർത്തകരുടെ മനോവീര്യം തകർക്കുന്നതും തെറ്റായ സന്ദേശം നൽകുന്നതുമായ ഈ നടപടിയോടുള്ള വിയോജിപ്പ് പാർട്ടി അധ്യക്ഷൻ രാഹുൽ ഗാന്ധിയോട് അറിയിച്ചതായും സുധീരൻ പറയുന്നു. ഫെയ്സ്ബുക് കുറിപ്പിന്റെ പൂർണരൂപം കോൺഗ്രസ് അധ്യക്ഷൻ രാഹുൽ ഗാന്ധിയുടെ പ്രധാന സഹായികളിൽ പ്രമുഖനായി നമ്മുടെ നേതാവ് എ. കെ. ആന്റണി നിലകൊള്ളുന്നു എന്നത് നമുക്കെല്ലാം അഭിമാനകരമാണ്. ജനാധിപത്യ മതേതര മുന്നേറ്റത്തിനായി ആവേശകരമായി നേതൃത്വം കൊടുക്കുന്ന രാഹുൽജിയെ ലക്ഷ്യത്തിൽ എത്തിക്കുന്നതിൽ സഹായകമായി ശ്രീ. കെ. സി. വേണുഗോപാലും ശ്രീ പി. സി. വിഷ്ണുനാഥും നിയോഗിക്കപ്പെട്ടതും ഏൽപിക്കപ്പെട്ട ചുമതല തങ്ങളാലാവും വിധം ഭംഗിയായി നിറവേറ്റുന്നതും സന്തോഷത്തോടെയാണ് നമ്മളെല്ലാവരും കാണുന്നത്. കഠിനാധ്വാനിയായ മുൻ മുഖ്യമന്ത്രി ശ്രീ. ഉമ്മൻ ചാണ്ടിയെ എഐസിസി ജനറൽ സെക്രട്ടറിയായി നിയമിച്ച് ആന്ധ്രയിൽ കോൺഗ്രസിനെ ശക്തിപ്പെടുത്താൻ നിയോഗിച്ചതും നമ്മുടെ ആത്മവിശ്വാസം വർധിപ്പിക്കുന്ന നല്ല കാര്യമാണ്. എന്നാൽ ഇപ്പോൾ ഒരു ശ്രീനിവാസൻ എ.ഐ.സി.സി. സെക്രട്ടറിയായി വന്നിരിക്കുന്നു എന്നത് അത്ഭുതത്തോടും തെല്ലൊരു ഞെട്ടലോടെയുമാണ് കേരളത്തിലെ കോൺഗ്രസ് പ്രവർത്തകരും കോൺഗ്രസിനെ സ്നേഹിക്കുന്ന സാധാരണ ജനങ്ങളും അറിഞ്ഞത്. ആരാണീ ശ്രീനിവാസൻ എന്ന ചോദ്യമാണ് വ്യാപകമായി പാർട്ടി പ്രവർത്തകരുടെ മനസ്സിൽ ഉയരുന്നത്. കോൺഗ്രസ് പ്രവർത്തന രംഗത്ത് മതിയായ പശ്ചാത്തലം ഇല്ലാത്ത ഇപ്രകാരം ഒരാൾ എങ്ങനെ ഇതുപോലൊരു സുപ്രധാന സ്ഥാനത്ത് വന്നുപെട്ടു.? ഏതായാലും പിൻവാതിലിൽ കൂടിയുള്ള ഈ വരവ് ഒഴിവാക്കപ്പെടേണ്ടതായിരുന്നു. പാർട്ടി പ്രവർത്തകരുടെ മനോവീര്യം തകർക്കുന്നതും തെറ്റായ സന്ദേശം നൽകുന്നതുമായ ഈ നടപടിയോടുള്ള വിയോജിപ്പ് കഴിഞ്ഞ ദിവസം തന്നെ രാഹുൽജിയെ അറിയിച്ചിട്ടുണ്ട്. കൂടുതൽ വായനയ്ക്ക്: ശ്രീനിവാസന്റെ വരവിൽ കോൺഗ്രസിലെ ഗ്രൂപ്പ് മാനേജർമാർ ഞെട്ടി. content highlights:VM Sudheeran fb post against k sreenivasan aicc secratary

from mathrubhumi.latestnews.rssfeed https://ift.tt/2KheRSL
via IFTTT